एका सुपरस्टारची अविश्वसनीय संघर्षगाथा: 500 रुपये घेऊन घराबाहेर पडलेला मुलगा आज भोजपुरी, बॉलिवूड आणि साऊथ चित्रपटसृष्टी गाजवतोय. जाणून घ्या, सुपरस्टार आणि खासदार रवी किशन यांच्या आयुष्यातील काही खास गोष्टी.
आज आम्ही तुम्हाला अशा एका अभिनेत्याबद्दल सांगणार आहोत, ज्याचं बालपण प्रचंड गरिबीत आणि संघर्षात गेलं. अभिनयाची आणि नृत्याची आवड इतकी होती की, कोणाच्याही वरातीत ते नाचायला लागायचे आणि गावातील रामलीलेत चक्क साडी नेसून सीतेची भूमिका साकारायचे. या भूमिकेमुळे त्यांना वडिलांचा प्रचंड मारही खावा लागला होता. पण म्हणतात ना, "जिसकी लगन सच्ची होती है, कामयाबी उसीके कदम चूमती है."
हा अभिनेता पुढे भोजपुरी सिनेसृष्टीचा 'शहेनशाह' बनला आणि फक्त तिथेच न थांबता, हिंदी आणि साऊथ सिनेसृष्टीतही आपल्या नावाचा झेंडा रोवला. आम्ही बोलत आहोत, सुपरस्टार आणि भाजप खासदार रवी किशन यांच्याबद्दल. आज रवी किशन हे नाव कोणत्याही ओळखीवर अवलंबून नाही. आपल्या दमदार अभिनयाने त्यांनी करोडो लोकांना आपलं फॅन बनवलं आहे. कधीकाळी फक्त ५०० रुपये खिशात घेऊन मुंबईत आलेल्या या अवलियाने आज कोट्यवधींची संपत्ती कमावली आहे.
जेव्हा वडिलांच्या मारापासून वाचण्यासाठी आईने दिले ५०० रुपये
१७ जुलै १९६९ रोजी उत्तर प्रदेशातील जौनपूर येथे जन्मलेल्या रवी किशन यांना लहानपणापासूनच अभिनयाची आवड होती. पण त्यांचे वडील, जे एक पुजारी होते, त्यांना हे अजिबात पसंत नव्हतं. 'नाच-गाणं करणं' हे त्यांच्यासाठी कमीपणाचं लक्षण होतं. जेव्हा त्यांना कळालं की आपला मुलगा रामलीलेत सीतेची भूमिका करतो, तेव्हा त्यांचा पारा चढला आणि त्यांनी रवी यांना बेदम मारहाण केली. त्यावेळी आईने मध्यस्थी केली आणि आपल्या मुलाचं स्वप्न तुटू नये म्हणून त्याला ५०० रुपये देऊन मुंबईला पळून जाण्यास सांगितलं. आईच्या त्या ५०० रुपयांच्या जोरावर एका लहानशा मुलाने स्वप्नांच्या नगरीकडे धाव घेतली.
अभिनेत्री भूमी पेडणेकर ने चालू केला पाण्याचा बिझनेस! पाणी बोटलची किंमत ऐकून व्हाल थक्क
मुंबईतील संघर्ष आणि भोजपुरी सिनेसृष्टीचा उदय
मुंबईत आल्यानंतरचा काळ सोपा नव्हता. अनेक रात्री उपाशीपोटी आणि रेल्वे स्टेशनवर झोपून काढाव्या लागल्या. छोट्या-मोठ्या भूमिकांसाठी दिवसरात्र वणवण फिरावं लागलं. पण रवी यांनी हार मानली नाही. सुरुवातीला हिंदी चित्रपटांमध्ये छोटे-मोठे रोल केल्यानंतर त्यांना खरी ओळख मिळाली ती भोजपुरी सिनेसृष्टीतून. तिथे त्यांनी 'देवरा बड़ा सतावेला', 'सैयां हमार' आणि 'पियवा बड़ा सतावेला' यांसारख्या एकापेक्षा एक सुपरहिट चित्रपटांची रांग लावली आणि ते भोजपुरी प्रेक्षकांच्या गळ्यातील ताईत बनले.
बॉलिवूड ते साऊथ: अभिनयाचा चौफेर डंका
33 साल अभिनय की तपस्या सिर्फ़ आप लोगों का प्यार आशीर्वाद मेरी ताक़त बनी रही 🔱🙏 pic.twitter.com/L19kGvk1qF
— Ravi Kishan (@ravikishann) August 8, 2025
भोजपुरीमध्ये स्वतःला सिद्ध केल्यानंतर रवी किशन यांनी पुन्हा एकदा बॉलिवूडकडे मोर्चा वळवला. सलमान खानच्या 'तेरे नाम' (Tere Naam) मधील त्यांची भूमिका आजही प्रेक्षकांच्या लक्षात आहे. यानंतर त्यांनी 'फिर हेरा फेरी' (Phir Hera Pheri), 'मुक्काबाज' (Mukkabaaz), 'बुलेट राजा' (Bullett Raja) आणि नुकत्याच गाजलेल्या 'लापता लेडीज' (Laapataa Ladies) सारख्या चित्रपटांमध्ये आपल्या अभिनयाची छाप सोडली. इतकंच नाही, तर त्यांनी साऊथ इंडस्ट्रीतही आपला दबदबा निर्माण केला. अल्लू अर्जुनच्या 'रेस गुर्रम' (Race Gurram) पासून ते 'सुप्रीम' (Supreme) आणि 'हेब्बुली' (Hebulli) पर्यंत अनेक दाक्षिणात्य चित्रपटांमध्ये त्यांनी खलनायकी भूमिकांना एका वेगळ्या उंचीवर नेऊन ठेवलं.
राजकारणातही यशस्वी 'एन्ट्री'
अभिनयाच्या शिखरावर पोहोचल्यानंतर रवी किशन यांनी राजकारणात प्रवेश केला. २०१४ मध्ये काँग्रेसच्या तिकिटावर निवडणूक लढवल्यानंतर, त्यांनी २०१७ मध्ये भारतीय जनता पक्षात (BJP) प्रवेश केला. २०१९ आणि २०२४ साली त्यांनी भाजपच्या तिकिटावर गोरखपूर लोकसभा मतदारसंघातून दणदणीत विजय मिळवला. आज ते एक यशस्वी अभिनेत्यासोबतच एक लोकप्रिय खासदार म्हणूनही ओळखले जातात.
आज आहेत कोट्यवधींचे मालक
एकेकाळी ५०० रुपये घेऊन घराबाहेर पडलेले रवी किशन आज कोट्यवधींच्या संपत्तीचे मालक आहेत. २०२४ च्या निवडणुकीतील प्रतिज्ञापत्रानुसार, त्यांची एकूण संपत्ती जवळपास ३५ कोटी रुपये आहे. मुंबई, गोरखपूर आणि जौनपूरमध्ये मिळून त्यांची एकूण ११ घरं आहेत. यासोबतच त्यांच्या ताफ्यात मर्सिडीज बेंझ (Mercedes-Benz), बीएमडब्ल्यू (BMW), जॅग्वार (Jaguar) आणि फॉर्च्यूनर (Fortuner) सारख्या अनेक आलिशान गाड्या आहेत.
रवी किशन यांची ही कहाणी एखाद्या फिल्मी कथेपेक्षा कमी नाही. गरिबी, संघर्ष आणि अपमान सहन करूनही, आपल्या स्वप्नांचा ध्यास घेतला तर यश नक्की मिळतं, हेच रवी किशन यांच्या प्रवासातून सिद्ध होतं.
0 टिप्पण्या